بهيره و ناشد

بهيره نك صبرى توكه نييوردى. ألنده كى كتابى سديرك اوزرينه فيرلاتدى. اوقوديغنى بر سيس آراسندن كورويور، آكلامييوردى. سيكيرلى آديملرله اوداده دولاشدى. پیانونك مدور صندالیه سنه اوطورارق نوطه لری قاریشدیردی. بر شی چالمق ایسته دی فقط پارماقلری اطاعت ایتمییوردی؛ قیزدی… واز کچدی.

تقسیمده بهیره نك پدری نصرت بك طرفندن بش سنه أول انشا ایتدیرلمش بویوك كارکیر بنانك آرقه جهتنده بولنان بو اوه، کنچ قیزك حجرۀ تخیلی ایدی. اورایه یاپ یالکز چکیلیر، کندی ألیله انتخاب ایتدیکی نارین و کبار أشیا ایله سه وه سه وه صاقلادیغی متعدد کتابلر آراسنده مطالعه ایده ر، موسیقی یه چالیشیر، یاخود ده پنجره دن کوزوکن استانبوله، مرمره دکزینه، بوغاز ایچینه باقه رق نظرلرینی اوقشایان مثلسز مُتَنَوِّعْ لوحه لر قارشیسنده اوزون اوزون دوشونوردی. بعضًا ده بو حجرۀ محرمیتنه صمیمی رفیقه لریله ساعتلرجه قاپانیر، أدبیاته، موسیقی یه، شیمدیکی حالده اوزاقدن، صانکه نیم شفاف بر پرده آرقه سندن سیر ایتدیکی حیاته دائر قونوشوردی. و اونك عندنده أك طاتلی دقیقه لر بویله مناقشات ایله دولو اولانلردی.

فقط بو کون، پك معزز بر رفیقه سیله برابر بولوندیغی حالده، بهیره هیچ شن و کوه زه دکلدی. بر قولتوغه کومولمش، بهیره نك حرکاتنی متبسمانه تعقیب ایده ن مادموازه ل نیقولت دارویل؛ اوزون بویلی، آچیق قومرال صاچلی، دائما نشئه لی بر لمعۀ ذکا ایله پارلایان قویو مائی کوزلی، ظریف بر کنچ قیزدی. نیقولتك پدری فرانسه سفارتی أرکانندن بر ذات ایدی که سنه لردن بری استانبولده بولونییوردی.

بهیره کنچ فرانسز قیز ایله «نوتردام دو سیون» مکتبنده بولونمش و شهادتنامه لرینی آله لی اوچ سنه اولدیغی حالده، آرالرنده کی دوستلق اصلا سکته دار اولمامشدی.

Bu gün Allah için ne yaptın

Yazılar